ظهور الألم و التمرين

ده من احد المبادئ المهمه اللى بتتاخد في الاعتبار وقت تصميم البرنامج التدريبي هو Exercise Selection  اختيار التمارين 

اختيار التمرين .. او اختيار الزاويه التدريبية ممكن يتأخر شوية في ترتيب الأهمية في بعض الكتب العلميه او عند بعض الباحثين و على النقيض خالص هتلاقيه overrated جداً عند البعض الاخر

مثال : هتلاقي واحد يقولك مش مهم زوايه التمرين ايه .. المهم تتمرن وخلاص

وواحد تاني اصل دراسه ال EMG بتقول كذا و زاويه كذا افضل من كذا , فنبدء ندخل في جدالات عن افضل زاويه للكتف و افضل زاويه للشيست

اقدر اسرد و ارص ليك الدراسات كلها الخاصة بـ الجزئية دي علمياً .. بس انا عاوزأدمج العلم بالخبرة عشان نقدر نطلع باحسن نتيجه 

اختيار التمارين بيتحدد على حسب عوامل كتيره منها

حاله المتدرب الفعليه مع المدرب . بيتمرن معايا اونلاين و لا بيتمرن مع مدرب فلور .

( بتفرق اه بتفرق … و ده نقطه هتعرفها بالخبره ان فيه ناس مش بتبعت فيديوهات تمرين ليها و انهم بالنسبه ليك كانه تمرين اعمى فاختيار زاويه التدريبه الامن ليه هيبقي اختيارك الامثل .. مش معني كده انك هتختار للتاني زوايه خطره .. لا .. المقصد مثلاً انك ممكن متحطش ليه ديدليفت او اسكوات لانك مش قادر تحكم على ادائه )

غير شخص تاني بيبعت فيديوهات للديدليفت بتاعته و الاسكوات و متابعين الاداء اول باول .. و اي حد تابع معايا عارف القصه دي كويس في كميه التعديلات اللى بيشوفها ..ازاي هنساوي الاتنين ببعض !!

الاصابات 

شخص مصاب في ركبته او كتفه .. مختلف عن شخص سليم معندهوش اي مشاكل

الهدف

شخص هدفه حجم وقوه – غير تحمل او قوة فقط – غير شخص هدفه يرجع يتمرن بدون مشاكل من اصابات سابقه – غير تحسين اداء و سرعه و جامب و غيره …

شخصيه المتدرب

( ايوة زي ما سمعت كده ! دي نقطه بالخبره هتعرفها ) شخص خايف يحط البار على كتفه و ينزل اسكوات .. تفهمه الاول انه ممكن يلعبه بأمان و لو طبقنا قواعد الامان ودرجنا الاوزان و عملنا كذا كذا .. لكن مهما قعدت تقنعه او تغير من فكره كمدرب ( فلور او اونلاين ) خلاص دماغه كده . فمش هلعبه تمرين هو خايف منه و يتصاب

ترتيب الايام في الجدول / الايام المتاحه … كل ده بيفرق في اختيار التمارين

لو بتلعب ديدليفت بشده عاليه او بتردد عالي او بحجم تدريبي عالي .. غير لو انت مش بتلعبها و معوضها بزوايه تانيه حتى لو بتلعب ديدليفت بشده متوسطه

كل ده هيفرق في معدلات الفاتيج او الارهاق .. و بتالى ممكن ياثر على اداره احمالك الباقيه في الجدول .

نقط الضعف و القوة عند المتدرب

غيرها من النقط زي ان التمرين يكون ممتع او لأ .. مستوي المتدرب .. و نقط تانيه يطول شرحها

تعمل ايه وقت حدوث الم (اثناء) تمرين معين ؟

الاول لازم تبقي فاهم ان فيه فرق بين ( الالم المزعج ) و بين ( حرقان عضلي Muscle Burn ) او ( الم مفاجيء نتيجه اصابه ) وغيرهم ..

فانا بتكلم حالياً عن الم بيظهر و بشكل مزعج وقت اداء زاويه تدريبيه فقط .. تبدء تراجع شوية اسئله في بالك كده ::

• مقياس الالم ده قد ايه ؟
• مراجعه الاداء .. نشوف الاداء الاول و نراجعه – الوزن مناسب ولا لأ – الاداء مظبوط ولا لأ ؟
• هل المدى الحركي ده مناسب ليا ولأ ؟
  
• هل الالم بيختفي لما بيغير وضعيه دراعي او رجلي او جسمي ؟ ولا ثابت علطول
• هل الالم بيظهر لو خفيت الوزن ؟
• هل كان التمرين ده بيعمل الم قبل كده ؟ ولا دي اول مره ؟ طيب ايه اللى جد جديد في التمرين او في حياتك عشان يحصل الم ؟
• هل الالم متكرر ولا لأ ؟
• هل فيه بدايات مشكله معينه ؟ زي التهاب او غيره
• هل نفس الحركه لو غيرتها بشكل تاني مش هتسبب الم ؟ ( يعني لو لعبت بدامبل بدل بار .. فهلاقي الالم اختفي )
• هل الحركه دي مهمه ومش هقدر استغني عن الزوايه دي فلازم اشوف ليها حل ؟ ولا اقدر اغير التمرين خالص !وغيرها من الاسئله ….

هنا بيجي دور الـ Exercise Selection … الطعن لو مسبب ليك الم و انت راجعت كل الاسئله دي و متأكد من ادائك و كل حاجه تمام .. خلاص غير التمرين لانه مش نهايه الكون يعني ..

فيه ناس تقولك :: (( اصل التمرين ده متعب يا كابتن .. اصله صعب .. اصله مرهق .. اصله كذا .. فعاوز اغير التمرين ))

ما هو انت اصلاً رايح التمرين عشان تتمرن بقوة و تتعب شوية و تحط احمال على العضله فده مش سبب منطقي لتغير التمرين .. ففيه فرق بين التعب و الارهاق من التمرين و بين ( الالم المزعج ) .

اتمني اكون قدرت اوصل ليك فكره بسيطه عن أهميه اختيار الزوايا و الاشكال التدريبيه المناسبه .

#Fit_Engineer #Fit_Engineer_Exercise_Selection