من الاسماك الرخيصه و المشهورة جدا , على الرغم من كده انتشاره بين الرياضيين قليل و ده راجع لكذا سبب :

عدم العلم بأهميته و بمكوناته / طعمه مش مناسب لكل الناس / نسبه الدهون اللى فيه

هنتكلم النهارده عليه باختصار ….

القيم الغذائيه للسردين

كل 100 جرام من السردين حوالى 208 كالوري فيهم حوالى :
22 جرام بروتين ( ممكن تختلف شوية من 20 -24 )
12 جرام دهون (ممكن تختلف من 12 – 15 جرام  حسب طريقه عمل السردين )
0 كارب

من ال 12 جرام دهون .. فيهم حوالى ((1.2 -1.6 جرام )) اوميجا3 صافي من ال EPA-DHA
و دي كميه كافيه جدا انك تقدر تجيبها يوميا عن طريق الاكل .. فهتبقي مش محتاج مكمل اوميجا3 في نفس اليوم اللى هتاخد فيها السردين

فوائد الاوميجا في السردين

الاوميجا3 ليها فوايد كتيره جدا مثبته علميا ::
خفض مستويات الدهون الثلاثيه .. تظبيط الكولسترول
الحمايه من بعض امراض القلب
مفيده جدا لصحه العقل و مفيده للست الحامل و جنينها ( يجب مراعاه كميه الاسماك الاسبوعيه للحامل )
مفيده جدا لصحه المفاصل و بعض انواع الالتهابات Inflammation
ممكن يبقي مفيد في تظبيط الوزن
ادله بسيطه لقت انه ممكن يبقي مفيد في تقليل من الالم العضليه بعد التمرين DOMS

ممكن يقلل اعراض الاكتئاب

ممكن يقلل ضغط الدم

الفايتمن و المعادن في السردين

السردين مش بس كده فيه كمان عناصر تانيه زي
حوالى 150 -250 وحده دوليه من Vitamin D
و اكتر من 150% من RDA من Vitamin B12
الكالسيوم حوالى 380 مج
فوسفور حوالى  490 مج
السيلينيوم 52 ميكروجرام ( مفيد للمناعه – مضاد للاكسده – وغيرها ) و دي نسبه جميله جداً

بفضل السردين الفريش , و لكن لو مفيش الا السردين المعلب تقدر تاكله عادي لكن تعمل حسابك في كميات الصوديوم المكتوبه عليه لانها بتبقي عاليه , و تاخد بالك من كميات الدهون

السردين من افضل الحاجات اللى مليانه بروتين واوميجا و فايتمن و معادن .. تقدر تدخلها في الدايت بتاعك بكل سهوله